मतदान करण्यासाठी मिळणार सुट्टी शासन परिपत्रक जारी

मतदान सूट्टी

विधानसभा सार्वत्रिक निवडणूक 2024 करिता सर्व विधानसभा मतदारसंघातील मतदारांना मतदानाच्या दिवशी मतदान करण्यासाठी सुट्टी अथवा दोन तासाची सवलत देण्याबाबतचे परिपत्रक महाराष्ट्र शासनाच्या उद्योग, ऊर्जा, कामगार व खणीकर्म विभागाने दिनांक 7 नोव्हेंबर 2024 रोजी निर्गमित केले असून याचा लाभ खाजगी क्षेत्रात काम करणाऱ्या कामगारांना सुद्धा मिळणार आहे. जाणून घेऊ या बाबत सविस्तर माहिती. 

मतदान करण्यासाठी मिळणार सुट्टी 

आपल्या देशात लोकशाही पद्धती असून 18 वर्षावरील नोंदणी झालेल्या सर्व नागरिकांनी प्रत्येक निवडणुकीमध्ये शंभर टक्के मतदान करणे अपेक्षित आहे.

ही बाब लक्षात घेऊन लोकप्रतिनिधित्व कायद्यानुसार मतदानाच्या दिवशी सर्वसाधारणपणे मतदारांना त्यांच्या मतदानाचा हक्क बजावता यावा यासाठी भरपगारी सुट्टी देण्यात येते किंवा काही ठिकाणी कामाच्या तासात योग्य ती सवलत देण्यात येते मात्र गेल्या काही निवडणूकी मध्ये असे दिसून आले आहे की संस्था /अस्थापना इत्यादी भरपगारी सुट्टी किंवा सवलत देत नाही यामुळे अनेक मतदारांना त्यांच्या मतदानापासून वंचित राहावे लागते जे लोकशाहीसाठी अत्यंत घातक आहे असे परिपत्रक मध्ये नमूद आहे.

भारत निवडणूक आयोगाने दिनांक 15 ऑक्टोबर 2024 रोजीच्या प्रसिद्धी पत्रकाद्वारे महाराष्ट्र राज्यातील विधानसभा सार्वत्रिक निवडणूक 2024 चा कार्यक्रम जाहीर केला आहे.

सदरील निवडणुकीचे मतदान दिनांक 20 नोव्हेंबर 2024 रोजी होणार आहे.

या निवडणुकीमध्ये सर्व मतदारांना त्यांच्या मतदानाचा हक्क योग्य रीतीने बजावता यावा यासाठी महाराष्ट्र शासनाने खालील प्रमाणे आदेश निर्गमित केले आहे.

निवडणूक होणाऱ्या मतदान क्षेत्रात मतदार असलेले कामगार,अधिकारी, कर्मचारी यांना मग ते कामा निमित्त निवडणूक होणाऱ्या क्षेञाबाहेर कार्यरत असले तरीही त्यांना निवडणुकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी. 

सदर सुट्टी उद्योग ऊर्जा व कामगार विभाग अंतर्गत येणाऱ्या सर्व आस्थापना, कारखाने, दुकाने,हॉटेल इत्यादींना लागू राहील अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी केवळ दोन ते तीन तासाची सवलत देता येईल मात्र त्याबाबत त्यांनी संबंधित जिल्हा निवडणूक अधिकारी यांची पूर्वपरवानगी घेणे आवश्यक राहील. 

कोणत्याही परिस्थितीत मतदारांना मतदानासाठी किमान दोन ते तीन तासाची भरपगारी सवलत मिळेल याची दक्षता संबंधित आस्थापना मालकांनी घेणे आवश्यक राहील. 

वर नमूद केल्यानुसार उद्योग, ऊर्जा, कामगार व खणीकर्म विभागा अंतर्गत येणाऱ्या सर्व आस्थापना, कारखाने, दुकाने इत्यादींच्या मालकांनी व्यवस्थापनाने वरील सूचनांचे योग्य ते अनुपालन होईल याची काटेकोरपणे खबरदारी घ्यावी मतदाराकडून मतदानाकरिता योग्य ती सुट्टी अथवा सवलत प्राप्त न झाल्याने मतदान करता येणे शक्य न झाल्याबाबत तक्रार आल्यास त्यांच्याविरुद्ध योग्य कारवाई करण्यात येणार आहे.

परिपत्रक वाचण्यासाठी व डाऊनलोड करण्यासाठी येथे क्लिक करा.